الثلاثاء، 25 يناير 2011

ياصباح ومساء الخيرات

.
ياصباح الخير علي معانا علي معانا الكروان غنى وصحانا ... بس مو حافظه الباجي :)
.
ما أدري ليش هالاغنيه معلقه معاي صارلها جم يوم بكل وقت اغنيها
.
شلونكم مع البرد والله مكسرني وما أتحرك من مكاني وشايله لحافي
.
وياي في اي مكان اقعد فيه وإذا دشيت بيت اهلها ومو شابين الفحم ولا مشغلين
.
الدفايه علي طول استولي علي لحاف امي واقعد ما غير مجابله الشاي والحليب والقهوه :)
.
هالأيام هابه هبه بشوربه البوركلي حق العشا مع العلم شوربه العدس المفضله عندي بالبرد
.
أمس وانا بعز اندماجي بالمسلسل وقاعده اشرب شوربتي والا الشاب اللطيف داش علي
.
ويتغشمر ومع الحجي قالي زهبي عمرج يوم الاربعا انشاء الله راح نروح العمره !!!
.
نقزت من مكاني اقوله مو من صجك وأخيرا تكرمت علي بعد الحنه فضيتلي من شغلك :))
.
حسيت من نظره يقولي الشره علي كليته بقشوره لوووووووووووووووول
.
حبيت اسلم عليكم وحللوني واللي يامر علي شي لايرده الا لسانه
.

الاثنين، 3 يناير 2011

دبي والكريسماس

.
كل عام وانتم بخير ويارب تكون سنه حلوة وسعيدة عليكم انشاءالله
.
قبل راس السنه كنت رايحة دبي وصادف الكريسماس كان في قمه الوناسه
.
بس بصراحة ما كأنك في دبي من الاحتفالات والزينه في كل مجمه ومكان
.
وين ماتروحين احلى مكان استمتعت فيه كان فندق مينا السلام وسوق الجميره
.
ونافوره برج خليفه القعدة في الكافيهات وايد حلوة :)
.
بس الضحك ريلي ونسيبي كل واحد بسيارة ومايدلون
.
كله ضايعين واذا واحد ضيع الثاني يعصبون
.
الحمد الله والشكر اقولهم احنا يايين علشان تعصبون
.
وشوي ويردون طبيعيين بصراحة رياييل الكويت
.
مشكله بالعصبيه اللي للحين ماني لاقيتلها حل :)
.

.
هذي الصورة في سوق الجميره
.
.
برج خليفه
.
.
مجمع فيستسفال
.
.
برج العرب واحنا رايحين فندق اتلانتس
.

سوق الجميره القديم

.

الأربعاء، 29 ديسمبر 2010

دعواتكم معانا

.
بسم الله الرحمن الرحيم
.
ياودود ياودود ياذا العرش المجيد يامبدئ يامعيد
.
يافعالا لما يريد أسألك بنور وجهك الذي ملئ اركان
.
عرشك واسألك بقدرتك التي قدرت بها على جميع
.
خلقك واسألك برحمتك التي وسعت كل شي أن
.
( تشفي صالح الجيماز وتعفي عنه يارب )
.
لا إله إلا انت يامغيث اغثني
.
يامغيث اغثني
.
اللهم صلي وسلم على سيدنا محمد
.
يارب هذا الدعاء ومنك الاجابه ياكريم
.

الجمعة، 10 ديسمبر 2010

اللهم من اراد ببلادنا بسوء اشغله بنفسه

>
.
( اللهم مالك الملك تؤتي من تشاء وتنزع الملك ممن تشاء وتعز من تشاء وتذل من تشاء بيدك
.
الخير إنك علي كل شي قدير ) اللهم رب جبريل وميكائيل واسرافيل فاطر السماوات والارض
.
عالم الغيب والشهاده أنت تحكم بين عبادك فيما كانوا فيه يختلفون ، اهدنا لما اختلف فيه من
.
الحق بإذنك إنك تهدي من تشاء إلى صراط مستقيم، اللهم آمنا في اوطاننا اللهم ارفع عنا
.
مقتك وغضبك عنا اللهم لاتعاقبنا بما فعل السفهاء منا اللهم اصلح ائمتنا وولاه امورنا اللهم
.
ارزقهم البطانه الصالحة التي تأمرهم بالمعروف وتنهاهم عن المنكر إنك ولي ذلك
.
القادر عليه
.
.
اللهم احفظ الكويت واهلها من كل مكروه يارب
.
اللهم قنا شر الفتن اللهم قنا شر الفتن
.
اللهم ادم علينا نعمه الامن والامان
.
اللهم اجعل هذا البلد آمنا مستقرا
.
ياااااااااارب العااااااااالمين
.

الاثنين، 6 ديسمبر 2010

عرش بلقيس (ازررررق)

>
>

.

الف مبرووووووووووووك الكاس والله يعطيهم الف عافيه

.

ما قصروا وفرحونا :)

.

كانت المباراه ونيسه والفرحة أونس مع حرقه الاعصاب اللي

.

صارت بس الحمد الله والشكر بيضوها

.


ويستاهلون كل الكؤوس اللي خذوها

.

المسيرات امس كانت وايد حلوه بس والله طول الشارع

.

وانا اقول الله يحفظ هاليهال اللي يتخطرفون بين السيارات

.

عنوان البوست من جريدة الرأي العام وايد عجبني :)

.

الله لايغير علينا انشاءالله ويجعل ايامنا دايما افراح

.

قولوا آمييييييييييين

.

الثلاثاء، 30 نوفمبر 2010

Discovary Garden

.
الجو هالايام حدة عجيب وانصح الكل ان يستغله امس اتصلت على
.
ريلي قلتله لوسمحت الساعة تسع بالليل انت محجوز وابي اطلع معاك :)
.
قام يضحك ويقولي ليش الساعه 9 يعني !!!
.
ما أدري بس ودي اطلع اتمشى في الوقت بس بشرط ترى انا اللي راح اسوق السياره
.
بصراحة اخاف لما اقوله على المكان مايرضى يروح :)
.
المهم طلعنا وشوي والا احنا في مواقف ديسكفري مول ... سألني وليش يايبتنا اهني
.
اليهال مو معانا ؟
.
انزل والحين تشوف ، حبيت اقعد بالحديقة اللي يمه واتمشى بصراحة المكان حده هدوء
.
وقمه ان يكون الذهن صافي وانت تمشي وتستمتع بالجو :)
.
بس طبعا بعدها قالي تصدقين عاد انتي اكبر مينونه شلون يتلج الفكره بس صج
.
استانست بالهدوءوبعيد عن اللويه ومشكوره على الطلعه
.
رديت البيت وانا احس اني فريش ، جربوه المكان حلو هادي حق اللي يحب الهدوء
.
عندي طلب صغيرون وايد وايد
.
هالايام قاعده اعيش مناورات اقناع زوجي العزيز بالرجوع حق ساحة العمل
.
واني ارجع شغلي بعد الاستقاله والقعده بالبيت صارلي سنتين بصراحة تمللت
.
بس طبعا جواب الرفض للحين ملازم لسانه
.
ابي دعاوتكم لي ان يوافق
.

الخميس، 25 نوفمبر 2010

يتغلون عليج

.
مساء الخير ، عيدكم مبارك وتقبل الله طاعتكم وسامحوني على التأخير
.
من رديت من السفر وانا ملازمة الفراش الصخونه مو راضيه تروح مني :(
.
ومالي خلق احد ولاعيالي اليوم شوي احسن مليت من الادويه وشرب الشوربه
.
لمدة سنه جدام ما ابي اشوف شوربه جدامي :)
.
يوم سافرت عيالي الصغار بالديره عند خالتي الله يحفظها وكنت ولهانه
.
عليهم حدي وكانت مكشختهم ويايبتهم المطار معاها عشتو تخيلوا
.
اكلمهم محد معبرني ولا يعطوني ويهه .. اقول حق خالتي شفيهم ؟
.
ما عليج منهم يتغلون عليج !!!!!!
.
والله مو باين شكلهم شايلين علي ليش مخليتهم :(
.
ألعب معاهم ماكو فايده وبجي الا يبون خالتي ومع المرض
.
والعزل صاروا كلش ... قلت اساحلهم اليوم واوديهم ديسكفرى يمكن
.
يرجع الود :)
.
على الهامش
.
امس دريت ان كأس الخليج ابتدى !!
.
ما أحس له صوت وحركه وخبه !!
.