دعواتكم معانا

.
بسم الله الرحمن الرحيم
.
ياودود ياودود ياذا العرش المجيد يامبدئ يامعيد
.
يافعالا لما يريد أسألك بنور وجهك الذي ملئ اركان
.
عرشك واسألك بقدرتك التي قدرت بها على جميع
.
خلقك واسألك برحمتك التي وسعت كل شي أن
.
( تشفي صالح الجيماز وتعفي عنه يارب )
.
لا إله إلا انت يامغيث اغثني
.
يامغيث اغثني
.
اللهم صلي وسلم على سيدنا محمد
.
يارب هذا الدعاء ومنك الاجابه ياكريم
.

اللهم من اراد ببلادنا بسوء اشغله بنفسه

>

.

( اللهم مالك الملك تؤتي من تشاء وتنزع الملك ممن تشاء وتعز من تشاء وتذل من تشاء بيدك

.

الخير إنك علي كل شي قدير ) اللهم رب جبريل وميكائيل واسرافيل فاطر السماوات والارض

.

عالم الغيب والشهاده أنت تحكم بين عبادك فيما كانوا فيه يختلفون ، اهدنا لما اختلف فيه من

.

الحق بإذنك إنك تهدي من تشاء إلى صراط مستقيم، اللهم آمنا في اوطاننا اللهم ارفع عنا

.

مقتك وغضبك عنا اللهم لاتعاقبنا بما فعل السفهاء منا اللهم اصلح ائمتنا وولاه امورنا اللهم

.

ارزقهم البطانه الصالحة التي تأمرهم بالمعروف وتنهاهم عن المنكر إنك ولي ذلك

.

القادر عليه

.

.

اللهم احفظ الكويت واهلها من كل مكروه يارب

.

اللهم قنا شر الفتن اللهم قنا شر الفتن

.

اللهم ادم علينا نعمه الامن والامان

.

اللهم اجعل هذا البلد آمنا مستقرا

.

ياااااااااارب العااااااااالمين

.

عرش بلقيس (ازررررق)

>
>

.

الف مبرووووووووووووك الكاس والله يعطيهم الف عافيه

.

ما قصروا وفرحونا :)

.

كانت المباراه ونيسه والفرحة أونس مع حرقه الاعصاب اللي

.

صارت بس الحمد الله والشكر بيضوها

.

ويستاهلون كل الكؤوس اللي خذوها

.

المسيرات امس كانت وايد حلوه بس والله طول الشارع

.

وانا اقول الله يحفظ هاليهال اللي يتخطرفون بين السيارات

.

عنوان البوست من جريدة الرأي العام وايد عجبني :)

.

الله لايغير علينا انشاءالله ويجعل ايامنا دايما افراح

.

قولوا آمييييييييييين

.

Discovary Garden

.
الجو هالايام حدة عجيب وانصح الكل ان يستغله امس اتصلت على
.
ريلي قلتله لوسمحت الساعة تسع بالليل انت محجوز وابي اطلع معاك :)
.
قام يضحك ويقولي ليش الساعه 9 يعني !!!
.
ما أدري بس ودي اطلع اتمشى في الوقت بس بشرط ترى انا اللي راح اسوق السياره
.
بصراحة اخاف لما اقوله على المكان مايرضى يروح :)
.
المهم طلعنا وشوي والا احنا في مواقف ديسكفري مول ... سألني وليش يايبتنا اهني
.
اليهال مو معانا ؟
.
انزل والحين تشوف ، حبيت اقعد بالحديقة اللي يمه واتمشى بصراحة المكان حده هدوء
.
وقمه ان يكون الذهن صافي وانت تمشي وتستمتع بالجو :)
.
بس طبعا بعدها قالي تصدقين عاد انتي اكبر مينونه شلون يتلج الفكره بس صج
.
استانست بالهدوءوبعيد عن اللويه ومشكوره على الطلعه
.
رديت البيت وانا احس اني فريش ، جربوه المكان حلو هادي حق اللي يحب الهدوء
.
عندي طلب صغيرون وايد وايد
.
هالايام قاعده اعيش مناورات اقناع زوجي العزيز بالرجوع حق ساحة العمل
.
واني ارجع شغلي بعد الاستقاله والقعده بالبيت صارلي سنتين بصراحة تمللت
.
بس طبعا جواب الرفض للحين ملازم لسانه
.
ابي دعاوتكم لي ان يوافق
.

يتغلون عليج

.

مساء الخير ، عيدكم مبارك وتقبل الله طاعتكم وسامحوني على التأخير

.

من رديت من السفر وانا ملازمة الفراش الصخونه مو راضيه تروح مني :(

.

ومالي خلق احد ولاعيالي اليوم شوي احسن مليت من الادويه وشرب الشوربه

.

لمدة سنه جدام ما ابي اشوف شوربه جدامي :)

.

يوم سافرت عيالي الصغار بالديره عند خالتي الله يحفظها وكنت ولهانه

.

عليهم حدي وكانت مكشختهم ويايبتهم المطار معاها عشتو تخيلوا

.

اكلمهم محد معبرني ولا يعطوني ويهه .. اقول حق خالتي شفيهم ؟

.

ما عليج منهم يتغلون عليج !!!!!!

.

والله مو باين شكلهم شايلين علي ليش مخليتهم :(

.

ألعب معاهم ماكو فايده وبجي الا يبون خالتي ومع المرض

.

والعزل صاروا كلش ... قلت اساحلهم اليوم واوديهم ديسكفرى يمكن

.

يرجع الود :)

.

على الهامش

.

امس دريت ان كأس الخليج ابتدى !!

.

ما أحس له صوت وحركه وخبه !!

.

ليش 320 دينار !!!

.

هذا عيب اللي ياخذ القرار بآخر دقيقة :(

.

كنت وايد متردده باني آخذ الخدامه معاي بالسفر قلت

.

ماله داعي بس الكبار معاي ، وحاجزه من فتره حق عطله

.

العيد . بس قعد اقولب الفكره قلت انا ليش وهقت نفسي

.

خل آخذها احسن على الاقل اذا نامو مبجر اخليها معاهم

.

بالفندق واقدر اطلع :)

.

قلت حق ريلي وقالي اوكي شوفيلها حجز لي اهني والكلام حلو

.

دخلت على موقع الوطنية وانصدمت ارد واعيد بالحجز تخيلوا

.

طلعلي 320 دينار !!!!

.

اقصلها درجة اولى معاي احسن ولما قلت حق ريلي قال مو من

.

صج والله كيفج تبينها حجزي ( يعني قط الكره في ملعبي )

.

قولبت السالفة وقلت قلعتي انا اللي تأخرت بعد شسوي حجزت

.

لها بس قلت آخر مره اسوي هالحركة :)

.

.

نهار بارد

.
قاعدة بالحديقة والجو حده حلو مع لسعة الهوا البارد احب هالشعور
.
احب استغل وقت الجو الحلو واستانس فيه لآخر دقيقة :)
.
حاطه تلفوني جدامي ومترددة بالاتصال لان قايلي قبل
.
لايطلع عنده شغل واجتماعات وايده اليوم على قولته
.
موتزعلين اذا دقيتي ومارديت عليج ولا على المسجات !
.
قتله انشاء الله اذا مارديت راح اعرف انك مشغول :)
.
يعني هم في ازعاج اليوم ؟
.
ليش ماتبي ازعاجي ؟
.
اليوم راحة وضحك ومشى :)
.
وفجأه والا اييني مسج يالمزعجة مرت 3 ساعات ماكو ولا سؤال ؟
.
رديت عليه : انا اسمع الكلام ومعطتك اجازه من ازعاجي :)
.
اقولج خليج على الازعاج احس ناقصني شي كل شوي اطالع تلفوني :)
.
عيل خلاص اول الزعاج الغدا بره اليوم ومالنا رده البيت الا بعد مااشبع
.
من الجو الحلو شقلت ؟
.
خلاص اللي تامرين فيه انا ما عندي الا مزعجة وحدة وطلباتها اوامر
.
وايد استانست تبون الصج زعلت في البداية وقعت افكر صج ازعاج
.
بس بسرعة تغير المود .. الله يخليه لي ولا يغير علينا يارب
.
نهايه اسبوع حلوة وجو احلى

رجل تتمناه كل النساء

.
في احد الاندية شباب متجمعين وفي موبايل على الطاوله يرن !
.
قام احد الاشخاص ورد على الموبايل وشغل الاسبيكر ..
.
وقال : ألــــــــــــــــــو
.
ردت الزوجة : حبيبي انا بالسوق وشفت مانطو جلد بيجنن مش غالي ب 1000$
.
قال : ولايهمك حبيبتي اشتريه
.
رجعت قالتله : حبيبي مريت على معرض المرسيدس شفت سياره 2011 سعرها 150000$
.
قالها بس ... ولايهمك اشتريها وتكون فل اوبشن
.
وبعدها سكر الخط بعد ما قالته : بحبك
.
رد عليها : وانا كمان بحبك
.
بعد ماسكر الموبايل لقى كل اللي كانو بالنادي يطالعونه مذهولين ومستغربين !!!
.
قام وسأل بكل براءة :
.
ياشباب حدا بيعرف لمين هالموبايل ؟
.

ايكاروس الحب

.
هالاسبوع زارو ريلي وفد انجليزي وكنا مسويلهم جدول يشمل على اهم الاماكن بالكويت
.
ومن ضمنها جزيره فيلكا كنت وايد مشتاقة اني اروح واتذكر احلى الايام من عقب الغزو
.
مارحت :( وطلعنا من الكويت بالعباره الساعة 8 الصبح كان الجو وايد حلو خذت الرحلة
..
تقريبا ساعة ونص اول ماوصلنا وحطينا اغراضنا في الفندق ما كنت مصدق اللي شفتها
.
من دمار حق احلى الذكريات وايد عجبهم المكان وتحسفو على اللي شافوه وانا الغصة
..
ذابحتني لما شفت الشاليهات والبيوت القديمة شنو صاير فيها .......:(
.
صارلنا موقف خلانا ميتين من الضحك ، المتحف كان مسكر بس بحكم الخبرة بجميع
.
مداخل ومخارج الجزيرة كان في مدخل صوب البحر طبعا رحنا ودخلنا وصلت صوب المتحف
.
ادور اذا في باب مفتوح في البيت القديم الموجود وما اسمع الا صوت الحارس يقول ممنوع
.
يافندم انتو دخلتو من فين ؟ لا تشوفوني شلون قعدت اضحك وريلي يرد علي ليش رايحة
.
يشوفونا :) صج استانست حتى بيت يدي القديم موجود وهذي بعض الصور بس صج حسافه عليها :(
.ز

.

هذي البيوت والفرجان القديمه

.

.

هذا بيت يدي القديم تتذكرون هالتلفزيون ؟
.

.
هذي الجمعية
.

.
شاليهات المشروعات السياحية
.

>

تحلطم

.
ما احب اتحلطم على احد او اتدخل بحياته بس ساعات تصير سوالف
.
تخلي الواحد غصب يتحلطم وماني قادره اتكلم اخاف تزعل مني :(
.
ومالقيت الا اكتبها وتشاركوني الراي ؟
.
وايد عندي الحياه الزوجيه مقدسه بين الزوجين ولازم كل واحد ياخذ حقة
.
تخيلو لما يكون الوقت اللي تتلاقين في مع ريلج قصير ويكون بإرادتج
.
مع تراكم المده .... ما اطول عليكم القصه :
.
الحياه اليومية لهم .. يرجع ريلها من الدوام ويتغدى يقعد شوي ويحط راسه وينام
.
ومايقعد الا متأخر غالبا عياله نايمين وساعات زوجته طالعة
.
يبدل ويروح الدوانية لغايه مايشبع وطبعا يرجع تكون هي نايمة
.
ويسهر بالبيت لان هو شبعان نوم ..وينام متأخر ويقعد الصبح حق الدوام
.
وعلى هالوتيره يوميا تقريبا ..
.
ولما تسولف اقوله متى تشوفينه وتقعدين معاها بجوكم انتو ؟
.
ترد علي شسوي عقب هالعمر ماراح أقدر اغير شي !!
.
الله راحمكم بالويك اند ان يتغدى معاج في بيت اهلج واذا ماعنده
.
بعد حداق والا رايح شاليه مع ربعه ... !
.
حلات كل شي له وقته انا اعتقد انها ساكته على اساس انها تطلع على كيفها
.
من غير مايحاسبها ... والا شرايكم ؟
.

الدزة

.

.

صارلنا اسبوع مشغولين انزهب اغراض دزه اخوي وفراره بالسوق

.

لي درجة ما احس بجسمي من التعب .. بس يستاهل الجعدة :)

.

يوم اللي امي وخواتي راحو يخطبون انا ماكنت معاهم بحكم السفر

.

المهم كشخنا وتيمعنا في بيت يدتي وبعدها حركنا حق بيت العروس

.

طبعا خواتي وبنات خالتي ما قصروا سوولهم مسيره من الهرنات

.

داخل الفريج ... ..... :)

.
عقب ما دخلنا والترحيب واليباب وقامت ام العروس مع امي كل وحدة

.

تعرف الاهل على بعضهم ومن كثر اللويه ما قدرت اميز أحد
.

ويت وحدة وقعدت بيني وبين اختي ومع السوالف ويه خواتي
.

سألتهم منو اللي راح تصير مرت اخوي ....

.

ما وعيت الا الضحك قام ويقولولي مو من صج ... انزين يالله يغربلكم

.

فشلتوني ليش الضحك .....!!!!!

.

تخيلو طلعت اللي قاعدة يمي صارلها ساعة وتسولف معاي هي

.

العروووووووووووووس :)

.

لا تتخيلون شكلي قمت اصب عرق وانا متوقعتها اختها !!

.

والكل قام يضحك بس تمنيت الارض تنشق وتبلعني لووووووووووول
.

ها نحن عدنا ننشد الهولو

.

.

الموعد كان قبل اسبوعين الساعة عشر الصبح يتصل علي زوجي الحبيب زهبي الجناط

.

عندي سفره شغل وراح آخذج معاي الطياره الساعة 7 المغرب اليوم !!!

.

مو من صجك مايمدي يرد علي عندج اكثر من 6 ساعات

.

ما كان جدامي الا كلمه انشاء الله وتامر :)

.

المهم كلمت خالتي علشان اليهال وزهبت الجناط حسيت نفسي مثل الساعه

.

بس علشان لا أنسى شي ...

.

صارت الساعة 5 وناديت الخدم علشان ينزلون الجناط واتجهنا الى المطار

.

بعد ما خلصنا وطارت الطياره والوجه كانت القاهرة ..

.

وبالفندق احط الاغراض التفت ما ألقى لابتوبي واسال ابونا ويضحك

.

يرد علي هالسفرة بدون كمبيوتر ولا انترنت علشان ترتاحين :)

.

حسيت اني ضايعة بدونه حتى بالفندق مايخليني استعمل الكمبيوتر :(

.

السفره كانت وايد حلوة وماكنت احس بالوقت مع اللويه والسهر

.

طول فتره الرده وانا اغني اغنيه هانحن عدنا ننشد الهولو عدنا للمدينه على متن السفيه ....

.

ها نحن عدنا ياكويت على شواطئك الجميله

.

على قولت ريلي من وين مطلعتها !

.

انتو شلونكم وشخباركم ولهت على سوالفكم ؟

.

جندل لما سمعت يرجى تجليس المقاعد تذكرتج وفي نجيب محفوظ بعد :)

.

ممنوع البوس !

.

صارلي اكثر من موقف في العيد واحد منهم طول يوم العيد اتحلطم عليه اول

.

ما يفضى بيتنا من اللي يعايدون :)

.

الموقف الاول

.

احترت مع الحريم اللي يسلمون وحدة تبوس اربع بوسات على كل خد وحدة :)

.

والثانية بوسه على الخد اليسار واربعة على اليمين لازم المجموع 5 !

.

وانا ضعت شوف التلخبط ما أدري اللي جدامي اي نوع من السلام تبي والا اذا نقصت العديد تسحبني

.

وتكمل البوسه الناقصة ... واتحلطم على امي وخواتي يعنى خل يوحدون السلام والا مره ثانية

.

راح اقول ممنوع البوس سلام باليد فقط ترد علي امي تأقلمي مع اللي يسلم عليج وشوفي طريقته !؟

.
.

فكينه من التحلطم .. بعد وانا صاجة كل واحد يسلم على كيفه انا خابرتها اربع بوسات كل خد وحدة :)

.

الموقف الثاني

.

في صلاة العيد من كل سنة خالتي متعلمه توزع عيادي بعد صلاه العيد على الخدم اللي ايون الصلاه

.

مع معازيبهم واليهال واحنا نسمع الخطبة لمحت وحدة من الحريم تبي تقوم واشرت على خدامتها

.

اسألت خالتي منو تبين قالت ما عليج امر ابي اعايد خدامتج وبعطيها المقسوم ... تخيلو ترد على خالتي

.

لا لاتعطينها وخذتها ومشت !!

.

استغربت من رد المعزبه انزين ليش تقطع رزقها حرام بالعيد ومسلمه ومتغربه تحرمها من فرحتها

.

قعدت اقول يمكن خايفة انها تخترب بس هذا مو سبب اللي تبي تخترب والا تسوي شي مو ناطرة

.

العيدية علشان تتخرب استغرب من سلوك بعض الناس !

.

ماخذتهم حق الخبز :)

.
كل سنه قبل رمضان نروح بيت يدتي نزهب شغلها حق العيد
.
نحط البيالات ونصف الحلو على الطاوله ونرتب لها البيت
.
لما خلصت شغلي قعدت مع يدتي اسولف معاها ....
.
ويابتلي صورتي يوم انا صغيره قعدت اضحك اقولها
.
شدعوه يمه كل هالذهب ملبسيني اياه .. هذي كشخة العيد
.
واصلا ياويلنا اذا مالبسناج وحنينه ايدج ....
.
ابي اقولج سالفة ....
.
مره دخلتو علينا بأول زواره بعد العيد ميتين من البجي
.
نبي نعرف السالف ما ندري شفيكم عقب الصيحة
.
رديتي علينا وقلتيلنا نبي عيادينا .. ظلينا مبطلين عيونا
.
مو منصجكم احنا مو قلنا راح نحطها لكم بالبنك !!
.
مانبي نبيهم .. امي راح تاخذهم كلهم وتشتري فيهم
.
خبز من الخباز !!!!!
.
ومن قايلكم وشطرى عليكم الخبز بط ماتاكلون الا الخبز
.
ومتنا عليكم من الضحك نبي نسكت مانقدر
.
ياحلوها من ايام الله لايحرمنا من وجودج بينا يارب:)))))
.
((عيدكم مبارك وتقبل الله طاعتكم انشاء الله ))
.
(( وعساكم من العايدين والفايزين يارب ))
.
ديرو بالكم على معدتكم وشوي شوي عليها من الاكل وعليكم بألف عافية :)
.

ليش العصبيه ؟

.
اليوم لاول مره اطلع الظهر كان طريجي صالون ارنوب ودبدوب
.
الروضة ماشيه في امان الله ومن زحمة المواقف انطر واحد يطلع
.
من الموقف علشان اوقف وما في احد يمي المهم طلع الريال وتوني
.
ابي اوقف والا تلف علي وحدة وتسفط من وين اطلعتلي مادري زين
.
مادعمنا بعض :(
.
نزلت جامتي سلمت وقتلها اختي انا واقفة قبلج وصارلي عشر دقايق
.

افتـــــــــــــــــــــــر !
.
ما وعيت الا تصارخ علي تقولي انتي اللي ما وقفت تمشين على بيض
.
خايفة لايتكسر حسبتج ماتبين توقفين والا حاطة في ريولج حنة خايفة
.
عليها انصدمت من ردها !!!!
.
رديت عليها وقتلها لوسمحتي لاتغلطين وتكلمي معاي بأدب
.
وتهقون سكتت والا انحرجت الا سبتني وعطتني ظهرها ومشت !
.
مت من الحره وللحين آكل بروحي ليش مارديت عليها بس ياربي
.
شنو ارد برمضان وصايمين والواحد مايبي يخرب صيامه
.
والله من كثر مو قاعدة تصارخ بعد عمري بنتي صرخت عليها
.
يو ار كريزي آند مونكي ابي اسكتها واقولها عيب ماكو فايدة
.
ترد علي ليش تصرخ عليج بس اشوة شكلها ما فهمتها والا يمكن
.
حطتها وطقتها ...
.
لي هالدرجة صار ما في احترام وسهله الواحد يصرخ بالشارع حتى
.
لوغلطااااااااان !

عساكم تعودونه وكل سنه وتصومونة

.

مبارك عليكم مابقى من الشهر ....

.

ياحلو رمضان بالديرة ولياليه وصلنا حق نصة والله يبلغنا باجي

.

ايامه وانشاء الله نكون من اللي يصومونه كل سنه اللهم آمين

.

سوالف قرقيعانية :-

.

هالسنة اتفقنا مانبي خبة بالقرقيعان كل وحدة تييب زبيله واتي

.

وفتحنا باب الصاله في بيت امي وقعدنا واليهال ياحلوهم وعلى

.

لبسهم اللي يشوق ويقرقعون وياحلو الحنة بايد اليهال :)

.

طبعا ماخليت بخاطري مع صراخ بنتي ماتبي تحط حنه وغصب

.

حنيتها وهي نايمة ولاتشوفون الصراخ لما قعدت وشافت ايدها

.

تاكل فيها او تمسك اي شي وابوي يشوفها ويتحلى عليها ويمسك

.

ايدها ويقولها شوفي ياحلو ريحتها ويبي يسكتها ابد مو مقتنعة

.

وترد عليه بابا وخرها بالدوا مو حلوة خايسه وشوفو الضحك:))

.

الله لا يغير علينا يارب ويديم هاليمعات الحلوة وايام رمضان

.

ويعيدة علينا بخير وصحة يارب

.

رمضان في باريس

.

كل عام وانتم بخير ومبارك عليكم الشهر
.
العام صمت اسبوع في القاهرة ياحلو ذيك الايام لما اتذكرها :(

.
بس هالسنه الاسبوع مو راضي يمر الوقت طويل وما كو اي شعور
.
بجو رمضان وروحانياته غير النظرة لما يسألونا ويقولولنا الله يعينكم

..
ونظرة الشفقة في عيونها :)
.
مرة فرنسية حاولت تفطرنا وتغرينا وتقول اذا ما شربنا ماي لمدة
.
اربع ساعات راح يضر بالذاكرة ونسبه الذكاء :))
.
ضحكت ورديت عليها ما يأثر واحنا مستانسين بصيامنا ونحتسب
.

الاجر من الله ...


بس ابد ما أنصح بالصوم بره وخاصة في الدول الاوربية ..انا مضيعة

وقتي بين المشي وقراية القران والمطبخ مع امي ومع هذا كله يبقى
.
وقت لغاية الساعة 10 بالليل وقت الفطور ... ماكله قلب ريلي وابوي
.
خل نرجع ويردون علي مابقى شي كلها الاسبوع الياي تكونين بالكويت
.
انشاء الله وعن الحنة لجيتنا ....بعد مالي الا الصبر :)
.

.

.

مجبوس الدجاج بالطريقة الباريسية

واخيرا افتكينا من الكره ولويتها ويستاهلون اسبانيا :)
.
عندنا صديقه فرنسية تعرفنا عليها من يوم ماقررنا الاقامه الصيفية في باريس
.
وتسكن معانا في نفس العمارة وكل سنه كانت تحب تتعلم منا شغله يديدة
.
وخاصة في الطباخ :)
.
امس كانت عازمتنا على العشا وتوقعنا راح ناكل مالذ وطاب من الاكل الباريسي
.
بس كان الطبق الرئيسي هو مجبوس الدياي ولما ضحكنا قالت لازم اتذوقونه
.
بطريقتي بصراحه كان طعمه عجيب وحلو وختمناها بشيز كيك وقعدنا نضحك
.
ونسولف معاها وبعدين قالت عندي طلب ابي تعلمون شلون تحطون المكياج !
.
قلتلها غالي والطلب همبه وبدين دوره التدريب معاها :)
.

وبعيد عن موضوع الغدا ....
.
مبروك ارتفل الغاليه دلوله تتربى بعزك انشاء الله
.
وتفرح فيها عروس مع اختها شيوخة :)
.

ولهت على الديره حيييييييييييل :(

Bonjour de Paris au Koweit

.

مايسوى علينا هالكره كرهتني السفر إذا نبي نطلع لازم

.

نرجع قبل بدايتها وتشتغل النجره فأخذنا قرار انا وامي

..

وزوجة أخوي نطلع بروحنا ونستانس ونخليهم مجابلين

.

الكره :p

ز

قبل يومين طلعنا كنا قاعدين يالكافيه بالشانز شوي

.

ولا زوجة اخوي تقول ما ني قادره اقعد حاسه في تعب

..

( هي حامل في أواخر الثامن !) لاتقولين بتولدين

.

لا ما أعتقد وقامت تضحك ؟ اخذناها وردينا الشقة توها داشه

.

تريح وتصرخ والله راح اوووووووولد :)

.

ونركض المستشفى ولا تشوفون حالتنا

.

لوووووووووووووووووووول

.

بفضل من الله رزقنا بنيه حلوة وبصحة وعافية شعليها بعد

.

نفاسها في باريس ....... بس لاتقولون ازدواج جنسيه

.

غير الكويتية مانبي :)

صباح العسل على الحلوين

.

.

مسلسل عذاب تسكير الجناط حق السفر والطلبات

.

الناقصة حتى آخر دقيقة !!

..

طبعا كله بصوب وآنا قاعدة احط الاغراض ومندمجة والا تطفي

.

الكهربا لا لالا مو وقته حر ياناس :(

..

طبعا منو اللي راح يرد عليج الف الحمد الله والشكر احنا قاعدين

.

بالكويت عيل الدول الثانية والفقيره شنو يسوون ؟

..

وخلال انتظار عودة الكهرباء والبرودة اللي خذت اربع ساعات تقريبا !!!!

..

تتصل امي الله يحفظها مو تنسين الاغراض اللي وصيتج عليهم :)

.

يمه مانسيت وباليوم قاعدة توصين على خمس تعش شي

.

هذا وانتي ماصارلج اسبوع من رايحة !

..

اقولج ترى انا قاعدة من غير مكيف وحر بعدين كلميني ؟

.

ترد علي انا قاعدة بالبراد انا وابوج والمطر شحلاته وقاعدين

.

نشرب القهوه وناكل شيز كيك اللي تحبينه :)

.

وتختمها مو تنسين العيش !

.

انشاء الله يمه عليكم بالعافية مع السلامة .

.

وانا اتحلطم بروحي صج كويتيين ما يستغنون عن العيش بس

.

الصراحة الفتره طويله وشكثر تبين تاكلين في المطاعم

.

:p

.

حبيت استودعكم الله واخليكم بحفظ الله ورعايته انا مسافره

.

باجر انشاء الله

.

اللي مسافر الله يسهل امره واجازة حلوة وسعيدة :)

.

واللي قاعد بالديره الله يبرد عيلكم ومالكم الا البحر والمجمعات :)

.

اشوفكم على خير بإذن الله

.

السياره بدون تكييف :(

.

الصيف بلش والحر مو طبيعي وتخيلوا وانا لابسه وطالعة اقضي مشاويري

.

الصبح ياحلو براد المكيف وفجأه يتحول إلى دفايه لاتطاق !!!!!!

.

مو صج كلش مو وكته يخترب :(

.

ادق على ابونا واقوله ...

.

يرد علي نسيت اقولج لاتطلعين فيها المكيف خربان !!

.

تعوذت من ابليس وسكرت التلفون ورديت البيت وانا ما خذه حمام سونا طبيعي ...

.

ويرد يكلمني ويضيع الموضوع ولا أرد عليه وللحين متحسف وانا متثيقله عليه وما ابي اكلمه :)

.

الله يرحمنا برحمته ويخفف عنا الحر واللي ماعنده سفره هالصيف مالكم الا البحر

.

نهايه اسبوع سعيدة

.

واهديكم اغنية عبدالحليم حافظ

.

دقوا الشامسي على البلاج :)

.

يامسافر وحدك وناسيني

.
على غير العادة هالاسبوع الزوارة في بيت اهلي كانت مع الخالات والعمات
.
وناس داشه وطالع يسلمون على امي وابوي لان من غير شر مسافري
.
دايما هما اول الطيور المهاجرة عندنا :)
.
وكان اغلب الكلام اللي يدور عن الامتحانات والسفر وكل واحد يتحلى
.
على مكان .... إلا حبيبتي اختي هالصيفية بروحها في الكويت !
.
والسبب انها موظفة يديدة وماميش رصيد اجازات :(
.
أنا وريلها قاعدين نخربها ونقولها اخذي الاسبوعين بدون راتب
.
وهي تقول بس ، بعد حمدي الله العوض ولا القطيعة انتي محصله شي !
.
تسكت وابوي يهدد فينا لاتخربونها خلوها تلتزم ولاحقة على السفر
.
واحنا حدنا نطفرها راح نقد بالكافيه اللي تحبينه وناكل برد التووووووت :)
.
ودها شوي وتكفخنا واحنا ماخذينها ضحك
.
ما أحب لويه السفر وترتيب الجناط خاصة تحوشني نرفزة مو طبيعية
.
اخاف لا انسى شي !
.
غير السوق اللي ريلي يقول ماصارت قبل السفر سوق وبالسفر سوق ماتشبعون
.
اللي يشوفكم يقول ماعندكم شي ؟
.
بصراحة حتى انا ماني لاقيه تفسير حق هالحاله والتسوق قبل وبعد :)
.

انا عم بحلم ليل نهار

من رديت من

صارلي اسبوع معلقة معاي اغنية ماجدة الرومي انا عم بحلم

.

وأغنيها بكل مكان حتى مع عيالي لما ألعبهم :)

.

كل يوم ريلي يسألني متى راح يخلص حلمج ؟

.

ارد عليه وابتسامه عريضة مليت منها صح ؟

.

يرد علي صدعتي راسي فيها أسكت وما أرد عليها

:P

..

انا وامواج والتاج السلطاني

.

قوانين التاج السلطاني :-

.

- اذكر اسم من طلب منك حل الواجب

.

- تحدث عن سته اسرار قد لايكشفها من يقابلك أول مره

.

- حول هذا الواجب إلى سته مدونين واذكر اسمائهم.

.

اجابه السؤال الأول

.

الغاليه امواج هي اللي وهقتني بهالواجب :)

.

إجابه السؤال الثاني

.

1- وايد يشوفوني مغروره وبعدين يكتشفون العكس

.

2- ما أحب العزايم والاستقبالات بس أروح مجبورة

.

3- يبط جبدي اللي يدخل في خصوصتي ويسأل عن كل شي

.

4- خوافة حدي وجبانه حتى من النمله :)

.

5- تلوع جبدي من أقل شي وما أحب اجرب خصوصا بالاكل

.

6- اتكاليه لأبعد الحدود بس محد متوهق الا ريلي

.

اجابه السؤال الثالث

.

ناطره اجابتكم (ارتفل - المقوع - شيمونا -نيكون-النور-شوش)

.

http://artful-artful.blogspot.com/

>

/http://almagwa3.blogspot.com/

>

http://shaymooona.blogspot.com/

.

http://daraziza.blogspot.com/

>

http://al-noooor.blogspot.com/

>

http://shooshness.blogspot.com/

>

صدفة في الخيران

.

كل سنه قبل سفره الصيف متعودين ناخذ شاليهات في منتزه الخيران

.

هالسنه كنا وايد خايفين خاصة ان الغبار ملازمنه في كل ويك اند :(

.

بس الحمد الله ان هالويك اند بصراحة الجو ولا أروع والقعدة بالليل على البحر عجيبه :)

.

وايد استغربت ان ماي البحر كان وايد بارد !!!

.

بس صارلتني احلى مفاجئة وما كنت متوقعنها وانا قاعدة العب اليهال بالصاله

.

والا تي وحده وتسلم علي وتسألني اذا أعرفها
.

قعدت اطاعها فتره ولا قدرت اذكرها مع ان المفروض ما أنساها بس تفرقنا 20 سنه !

.

صديقتي من الابتدائي وكانت تزورني على طول في البيت وتنام عندنا واستانست حيل وجابلنا

.

بعض وقعدنا نتذكر سوالفنا والشطانه صج كانت ايام :)

.

بصراحة وايد استانست بالرحلة والاروع لما شفت رفيجتي

.

ابراج الكويت

.

صارلي اسبوع محكوره والسبب الغبار والحساسية !!!

.

ماتسوى على الطلعة حتى لو حق الجمعية ينعفس يومي كله

.

وما صدقت لما قعدت اليوم الصبح وشفت الجو

..

بدون غبار استانست :)

.

قعدت ريلي من النوم وقتله خل نتريق بره

.

واخذنا طريج البحر ويسألني وين تبين كنت وقتها قاعدة أطالع

.

البحر رديت عليه خل نروح الابراج ( أدري بتقولون قديمة )

.

خبري فيها لما حفلة التخرج من الثانوية وتغدينا فيها :)

.

استغربت ماتغير فيها شي من طريقة المطعم او حتى الطاولات

.

وطريقة الديكور انصدمتّ!!! المفروض على الاقل يطورون منها

.

البوفيه كان وايد عادي بس استانست على القعدة ومنظر الكويت

.

والبحرحسيت براحة نفسيه وريلي يضحك علي يقولي خليتي

.

كل الاماكن واخترتي الابراج :)

.

بصراحه ماهمني المكان كثر ما أنا ابي اغير جو حتى لوماكله

.

حلوم من شلاويط مع عصير برتقال راح يكون حلو على قلبي

.

.

.

صورة دسمان

.

.

هذا صحني

.

.

هذا صحن ريلي
.

33 العيد الاحلى

.

هذي الكيكة وحاطين شمعة وحده :)

.

اوركيده : ألو هلا يمه شلونج بغيت اقولج انا اليوم ماني يايه الزوارة بس راح اقط اليهال عليكم

.

أمي : خير انشاء الله عسى مافيج شي

.

أوركيده : خير بويهج لا بس ابونا اليوم عازمني على العشا

.

امي : ميخالف يمه قعدي معانا نص ساعة بس وامشي

.

أوركيده : انشاء الله راح اي على الساعة سبع

.

أمي : حياج الله ناطرينج

.

لبست ولبست اليهال ورحنا ولما وصلت وييت ابي ادخل اشوف ليتات مسكره

.

والبيت ظلمه شالسالفة ودخلت اتسحب على ليت التلفون

..

وبطلت باب الصاله والا اخوي يبطل الليتات واسمع الصراخ

.

HaPpY BiRtHdAy To YoU

.

وانا ناسية ان اليوم عيد ميلادي وخربو المفاجأه على ريلي

.

لما سألته شنو مناسبة العشا اليوم وخله يوم ثاني مارضى يأجله !

.

قعدت معاهم وطفينه الشمعة اللي حاطينه استانست انهم حاطين شمعة وحده :)

.

وطلعت كملت باجي اليوم مع ريلي وبصراحة كان اليوم وايد حلو ومابغيته يخلص

.

السنه هذي وايد كانت حلوه على بفضل الله رزقني فيها بعيالي غالية وعبدالعزيز

.

وانتو اخواني وخواتي اللي تشرفت بمعرفتكم من خلال مدونتي الا اذا ما قريت

.

شنو كاتبين حتى لو ما أعلق احس ناقصني شي .

.

مشكوره يأحلى أم وأحلى أخوان سعادتي ماني عارف اوصفه بمفاجأتكم لي

.

ريلي وحبيبي ودنيتي كلها الله يخليك لي ولا يحرمني من وجودك يمي

.

.